◀️ إزاي تعمل 📃CV ⤵️️ بروفيشنال؟
سواء كنت لسه طالب أو خريج فريش
والناس اللى بتفضل تقدم بالسنين وماحدش بيتصل بيها تركز هنا
إيه الـCv ده وإيه فايدته ؟
هو السيره الذاتيه اللي بتتكلم عنك وعن خبراتك سواء كانت دراسة أو تدريبات أو كورسات أو تطوع أو مهارات….
هل الـ Cv مهم ؟🤔🤔
طبعا مهم 👌👏
الـ Cv يعتبر حلقة الوصل بينك وبين الشركة أو المكان اللى انت عايز تدرب أو تشتغل فيه
الـ Cv يعتبر هو نص الطريق الأول “لأنه هو اللى هيوصلك للإنترفيو
علشان يتأكد من النص الأول
سألت نفسك لما يكون ال HR قدامه مثلاً 300 أو 400 Cv وهو محتاج يكلم وليكن 10 إيه اللى يخليه يكلمك؟
الـ Cv بتاعك وطريقة كتابتة وطريقة عرضك لمهاراتك
لازم دايما تطور منه وتعمله update
طبعا هتطور منه عن طريق انك هتطور من نفسك
الـCv بتاعك على أساسه أنت اللى هتحدد
تشتغل فى شركة كبيرة أو انترناشونال ولا شركة لوكال !!!
ف لازم لازم لو أنت طالب دلوقتى تبدأ تعمله و تعرف ايه اللى ناقصك عشان تكمله 🙏
_________________
تعالي نبدا نعمله مع بعض خطوه خطوه 💪👌
فى البداية بنكتب الـCv بنفس الترتيب ده
◀️ إسمك ثلاثي عريض فى نص الـCv
وتراعى إن أول كل حرف من إسمك يكون Capital ويكون حجم الخط ١٦ أو ١٨ اكبر حاجه وده بيكون اكبر خط في ال Cv
Ahmed Mahmoud Abdellatief
◀️ عنوانك
◀️ رقم موبايل
◀️ الإيميل
ماينفعش يبقى أسماء مستعارة أو مختصرة لازم يبقى فورمال زي مثلا [email protected]
●Career Objective
من أهم الأجزاء وممكن على أساسة الـ HR يكمل قراءة الـCv أو لأ
معظم الناس بتكون فاكرة ان انت بتكتب هنا هدفك أو (الوظيفة اللى انت عايزها) بس!!
ناس كانت بعتالى الـCv وكاتبة فيه كدا بالنص
Seeking a bout new challenge in…….
طبعا الكلام ده غلط .. يعنى انت عايز تاخد بس!! .. طب انت هتدى إيه أو إيه اللى بيميزك أو هتضيف إيه للشركة!!! 😁
الصح انك بتكتب ايه خبرتك أو اللي بيميزك علشان تشتغل في المجال ده ” تدريب أو تطوع أو كورسات أو شغل قبل التخرج فى نفس المجال أو دراستك” .. يعنى انت هتدي ايه للشركة مقابل هدفك ده
يبقي هنا لازم تكتب
اي الحاجة اللى بتميزك علشان تشتغل فى المجال اللى انت كاتبه (نقاط قوتك أو خبرتك أو دراستك) + هدفك(وظيفتك)
▪️Education
بتكتب دراستك هنا سواء كلية أو ماستر أو دكتوراة
وتخصصك وتقديرك
أخر حاجة انت حصلت عليها بتتكتب فوق.
يعنى لو انت معاك ماجستير بتكتبه فوق خالص وتحته البكالوريوس وهكذا…
♦️ترتيب ال cv كله في جميع الاحزاء بيكون من الاحدث للاقدم
مثال :-
Al Azhar University in Cairo,, Faculty of Commerce,
Bachelor’s Degree in Management
▶️ Major: Business administration
▶️ Grade: Very good.
وبتكتب مشروع التخرج برضو وتقديرك فيه لو عندك
لو إنت طالب بتكتب انت فى الفرقة الكام أو بتكتب السنه اللى انت متوقع هتتخرج فيها
● Work experience
الأماكن اللى اشتغلت فيها ودورك كان فيها إيه وبدأت الشغل فيها إمتى ومدة الشغل كانت قد إيه
وبنكتب أخر مكان اشتغلنا فيه فوق خالص
يعنى الترتيب على حسب الأحدث مش الأهم يعنى اخر حاجة اشتغلتها فوق خالص والأقدم منها تحتها وهكذا
طبعا لو انت طالب وما اشتغلتش مش شرط تكتبها ودا هيعوضها الجزء بتاع الأنشطة الطلابية والتطوع
ولو ما اتطوعتش فيه جزء تانى هيعوضها برضو 😁 هتعرفة تحت
▪️ Professional Development
وهنا بتكتب فيه الكورسات اللي خدتها اوفلاين
وطبعا تركز الافضل علي الكورسات المتعلقه بمجاللك
وبتكتب اسم الكورس +اسم المكان + مده الكورس + التاريخ أو الفتره الي خدت فيها الحورس
مثال :
Human Resources ,ABC Academy ,Cairo (24 Hours)
(May2020_July2020)
▪️Professional Training
وهنا بتكتب فيه الكورسات اللي خدتها اونلاين
وطبعا تركز الافضل علي الكورسات المتعلقه بمجاللك
وبتكتب اسم الكورس +اسم الموقع أو المنصه التعليمية + مده الكورس + التاريخ أو الفتره الي خدت فيها الحورس
مثال :
Human Resources , Udemy ,(24 Hours)
(May2020_July2020)
● Internships
دى التدريبات الصيفية اللى انت ادربت فيها
الـ internship ده لو انت لسه طالب و الشركه ادتك فرصه تدريب تتعرف علي طبيعه الشغل بنظره عامه وبتترواح من شهر ل٦ وساعات سنه في بعض الشركات
● Volunteering work
من أهم الحاجات اللى بتقوي الـ Cv بتاعك وممكن تترفض أو تتقبل فى منحه بسببها أو حتي في شغل ويتكون عامل كبير للفلتره بالذات لما يكون المتقدمين زي بعض في كل حاجه او لسه متخرجين
بتكتب الأنشطة اللى كنت متطوع فيها سواء طلابية أو جمعيات خيرية
وماتكتبش المكان بإختصار وليكن “ABC”
لأ إكتب الإسم كامل
وتكتب دورك فيه كان إيه وليكن member of public relations Head
● skills
اللغة والكمبيوتر ومهاراتك
▶️ language️
فى ناس بتكتب انها مستواها فى الـEnglish مثلا Very good علطول
في ناس بتكتب في كل مهاره وده برده مش غلط
Listening .. Writing .. Reading .. Speaking ..
مثال :-
– English
good in listening, very good in Writing, very good in reading and good in speaking.
وممكن تكتب مستواك فى اللغة
A1/A2–B1/B2–C1/C2
▶️ Technical skills
بتكتب مستواك فى برامج الأوفيس أو إستخدام الإنترنت عموما ولو بتعرف تشتغل على أى برامج تصميم أو غيرها بتكتبها
مثال :-
– good command of Microsoft office tools.
– good command of Photoshop and illustrator tools.
– I use internet tools sufficiently and effectively
▶️ Interpersonal skills
وركز في الجزء ده جدا 👌👌👌👌👌👌
ناس كتير بترص هنا عشرومية مهارة!!
الصح والأفضل إنك بتكتب المهارات اللى عندك فعلا أو إكتسبتها
مهارة مثلا زي مهارة التواصل هتكتبها وتكتب انت اكتسبتها ازاي
– Communication skills gained through my experience as a head (member) of public relation committee in a “إسم التيم أو النشاط” Team
أو ممكن تكون إكتسبتها فى شغل زى الميديكال برضو
لو عندك مهارة مثلا زى الProblem solving هتكتب إنت اكتسبتها منين
نفس الحكاية فى باقى المهارات
● Conferences and workshops
برضو مش لازم تكتب هنا العشرومية مؤتمر اللي انت حضرتهم 😁
إكتب اللي انت حضرته واستفدت منه وطلعت بمعلومات كويسة وفاكر مين المحاضرين…. إلخ
مننساش الترتيب على حسب الأحدث مش الأهم يعنى اخر حاجة حضرتها فوق خالص والأقدم منها تحتها وهكذا
● personal information
▶️ Date of birth:
▶️ Military service: Exemption/postponed/Finished
_________________
♦️ركز في الاساله دي.🛑🛑🛑🛑
◀️ أحط صوره فى الـ Cv ولا لأ ؟
ما تحطش صورة إلا لو كان مطلوب فى إعلان الوظيفة
لأن صورتك بتدى انطباع مبدأى عنك وبالذات لو انت مقدم فى وظيفة ليها علاقة بالمظهر
فاسيبة هو يحكم لما يشوفك ممكن يكون فيك مميزات تانية تخلية يتغاضي عن النقطة دى
لو الصورة مطلوبة فى الإعلان هتحطها وتكون فورمال وخلفية بيضاء وعلى الشمال مش اليمين
ناس كتير بلاقيها حطاها على اليمين ودا غلط لأن الCv إنجليزى فبنحطها على الشمال
◀️ أعمل الـ Cv إمتى قبل التخرج ولا بعدة؟
أنا كنت عاملة بعد سنه أولى كلية وشايف إنه وقت مناسب جدا
لأنى كل شوية كنت بكتشف خطأ معين فى الـ Cv فابصلحة لو كنت عملته بعد التخرج كنت هقع فى كل الغلطات دى
كمان الـ Cv لما تشوفة كل شوية وانت بتعملة Update أو بتملاه ب حاجة جديدة اتعلمتها أو خبرة جديدة إكتسبتها بيكون ليها متعة خاصة
وبرضو كل ماتبص للـCv وتحس إنه ناقص كل ماهتشتغل على نفسك أكتر
◀️ إزاى أرتب أحداث الـ Cv ؟
على حسب الأحدث من حيث التواريخ
بمعنى.. إن اخر مكان اتدربت أو اشتغلت أو اتطوعت فية بيكون فوق خالص واللى تحته بيكون أقدم منه فى التاريخ وهكذا..
يعنى أخدث مكان فوق وأقدم مكان فى التاريخ تحت
◀️ أبعت الـ Word ⏪ Cv ولا PDF ؟
إبعته PDF علشان التنسيق بتاعة مايتغيرش لأن ال HR ممكن يكون شغال على برامج أوفيس غير اللى انت شغال عليها فايظهر الـ Cv معاه بشكل مختلف غير اللى انت عامله.